Main Menu

Joomla Slide Menu by DART Creations

ສະຖິຕິຈຳນວນຜູ້ເຂົ້າຊົມ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterຜູ້ເຂົ້າຊົມ ວັນນີ້115
mod_vvisit_counterຜູ້ເຂົ້າຊົມ ມື້ວານ1280
mod_vvisit_counterຜູ້ເຂົ້າຊົມ ອາທິດນີ້7785
mod_vvisit_counterຜູ້ເຂົ້າຊົມ ອາທິດ ຜ່ານມາ5295
mod_vvisit_counterຜູ້ເຂົ້າຊົມ ເດືອນນີ້13080
mod_vvisit_counterຜູ້ເຂົ້າຊົມ ເດືອນຜ່ານມາ0
mod_vvisit_counterລວມທັງຫມົດ13080

Online (20 minutes ago): 13
Your IP: 54.162.10.211
,
Today: ກ. ຍ. 23, 2017
ສານ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນໂອກາດ ວັນສິ່ງແວດລ້ອມໂລກ, PDF ພິມ ອີເມລ
ຂຽນໂດຍ ພະ​ແນກ​​ໂຄ​ສະ​ນາ​ປະ​ຊາ​ສຳ​ພັນ   
ວັນອັງຄານທີ່ 06 ມິຖຸນາ 2017 ເວລາ 12: 00

alt

ບັນດາ​ທ່ານ ທີ່​ນັບຖື,

ພີ່ນ້ອງຮ່ວມຊາດ ທີ່ຮັກແພງ ທັງຫຼາຍ,

ການສະເຫຼີມສະຫຼອງວັນສິ່ງແວດລ້ອມໂລກ ຢູ່ ສປປ ລາວ ເຮົາ ໃນປີນີ້ ກໍ່ຄື ທຸກໆປີ ຜ່ານມາ ທີ່ໄດ້ສະເຫຼີມສະຫຼອງ ໄປພ້ອມກັບ ປະຊາຊາດໂລກ ຢູ່ທົ່ວທຸກຫົນແຫ່ງ ທຸກຂົງເຂດ, ເຊິ່ງໄດ້ກຳນົດເອົາ ວັນທີ 5 ມິຖຸນາ ຂອງທຸກໆປີ ເປັນວັນສະເຫຼີມສະຫຼອງ ແລະ ໄດ້ກຳນົດຫົວຂໍ້ ທີ່ຕ່າງກັນ ໃນແຕ່ລະປີ ເພື່ອເປັນການປູກຈິດສຳນຶກ, ປຸກລະດົມການເຂົ້າຮ່ວມ ແລະ ສົ່ງເສີມການ ແກ້ໄຂບັນຫາທີ່ພົ້ນເດັ່ນ ເກີດຂື້ນໃນແຕ່ລະໄລຍະ. ການສະຫຼອງວັນສິ່ງແວດລ້ອມໂລກ ໄດ້ເລີ່ມ ປະຕິບັດ ນັບແຕ່ປີ 1972 ເປັນຕົ້ນມາ ພາຍຫຼັງ ກອງປະຊຸມສະຫະປະຊາຊາດ ວ່າດ້ວຍ ສິ່ງແວດ ລ້ອມມະນຸດ. ສໍາລັບປີນີ້ ແມ່ນຄົບຮອບ 45 ປີ, ປະເທດ ການາດາ ໄດ້ຖືກຄັດເລືອກໃຫ້ເປັນ ເຈົ້າພາບຈັດງານສະເຫຼີມສະຫຼອງວັນດັ່ງກ່າວ ໂດຍໄດ້ກໍານົດ ຫົວຂໍ້: ການເຊື່ອມໂຍມມະນຸດເຮົາ ເຂົ້າກັບທຳມະຊາດ ພາຍໃຕ້ ຄໍາຂວັນ ພວກເຮົາຢູ່ກັບທຳມະຊາດ “Connecting people to Nature: I’m With Nature”.

ຈຸດປະສົງ ຂອງການສະເຫຼີມສະຫຼອງວັນສິ່ງແວດລ້ອມໂລກ ແມ່ນເພື່ອສ້າງຈິດສໍານຶກ ໃຫ້ ແກ່ ປະຊາຊາດໃນທົ່ວສັງຄົມ ໃນທົ່ວໂລກ ເພື່ອດຶງດູດຄວາມສົນໃຈ ແລະ ຄວາມເຂົ້າໃຈ ກ່ຽວກັບ ວຽກງານສິ່ງແວດລ້ອມ, ພ້ອມທັງເລັ່ງທວງໃຫ້ອົງກອນສິ່ງແວດລ້ອມຕ່າງໆ ຕ້ອງມີການວາງແຜນ ແລະ ດຳເນີນງານການແກ້ໄຂບັນຫາສິ່ງແວດລ້ອມໃນປະເທດຂອງຕົນ ໂດຍໃຫ້ມີການເຂົ້້າຮ່ວມ ຂອງທຸກພາກສ່ວນຢ່າງເປັນເຈົ້າການ ເພື່ອເຮັດໃຫ້ບັນຫາສິ່ງແວດລ້ອມມີການປ່ຽນແປງ ໄປທາງ ບວກ ແລະ ສາມາດປົກປັກຮັກສາຊັບພະຍາກອນທໍາມະຊາດໃນໂລກຂອງພວກເຮົາ ໄວ້ໃຫ້ມີ ຄວາມຍືນຍົງ, ປະຊາຊົນມີສຸຂະພາບທີ່ດີ.

 

ພີ່ນ້ອງຮ່ວມຊາດ ທີ່ຮັກແພງ ທັງຫຼາຍ,

 

ຄືເຮົາຮູ້ນໍາກັນແລ້ວວ່າ  ບັນຫາສິ່ງແວດລ້ອມ ໃນປະຈຸບັນ ແມ່ນນັບມື້ເພີ່ມຂື້ນ ຍ້ອນນໍ້າມື ຂອງມະນຸດພວກເຮົາ ທີ່ມີການຂຸດຄົ້ນ, ນໍ້າໃຊ້ຊັບພະຍາກອນທໍາມະຊາດແບບຟຸມເຟືອຍ, ມີການ ທໍາລາຍປ່າໄມ້, ການປ່ອຍສິ່ງເສດເຫຼືອ ຈາກໂຮງງານອຸດສາຫະກໍາ, ສິ່ງເສດເຫລືອ ຈາກຄົວເຮືອນ ນັບມື້ນັບເພີ່ມຂື້ນ, ການນໍາໃຊ້ສານເຄມີເຂົ້າໃນກະສິກຳ ແລະ ອື່ນໆ ເຊິ່ງທັງໝົດນີ້ ເປັນສາເຫດ ເຮັດໃຫ້ເກີດສະພາວະໂລກຮ້ອນ, ການຂາດເຂີນສະບຽງອາຫານ, ສະພາບແວດລ້ອມເປັນຕົ້ນ ນໍ້າ, ດິນ, ອາກາດ ມີມົນລະພິດ ແລະ ສົ່ງຜົນກະທົບຕໍ່ສຸຂະພາບ, ສະພາບດິນຟ້າອາກາດ ມີການປ່ຽນ ແປງເວົ້າລວມ, ເວົ້້າສະເພາະ ຢູ່ ສປປ ລາວ ການນໍາໃຊ້ຊັບພະຍາກອນທໍາມະຊາດ ຍັງເກີດມີລັກ ສະນະຟຸມເຟືອຍ, ສະພາບການຂະຫຍາຍຕົວຂອງຕົວເມືອງ, ການເພີ່ມຂື້ນ ຂອງພົນລະເມືອງ ເຮັດໃຫ້ມີຂີ້ເຫຍື້ອ ແລະ ສິ່ງເຫຼືອເພີ້ມຂື້ນ, ລົດໜາແໜ້ນ, ເກີດມີນໍ້າເປື້ອນ, ມົນລະພິດທາງ ອາກາດ ແລະ ອື່ນໆ; ການຄຸ້ມຄອງໂຄງການລົງທຶນ ຍັງເຮັດບໍ່ໄດ້ດີ ເຮັດໃຫ້ເກີດມີຜົນກະທົບ ຕໍ່ ສິ່ງແວດລ້ອມ ແລະ ສັງຄົມ, ປ່າໄມ້ຖືກທໍາລາຍ, ການຄ້າ-ຂາຍສັດນໍ້າ, ສັດປ່າ ແລະ ພືດພັນປ່າ ຍັງສືບຕໍ່ແບບຊະຊາຍ ແລະ ຜິດກົດໝາຍຢູ່ ເປັນເຫດເຮັດໃຫ້ຊີວະນາໆພັນ ຈຳນວນ ທັງໝົດ 2,701 ຊະນິດ ທີ່ໄດ້ພົບເຫັນໃນ ສປປ ລາວ, ປະມານ 157 ຊະນິດ ກໍາລັງມີຄວາມສ່ຽງທີ່ໃກ້ຈະ ສູນພັນ ແລະ 115 ຊະນິດ ກໍາລັງຖືກຂົ່ມຂູ່.

ຕໍ່ບັນຫາ ແລະ ສະພາບການດັ່ງກ່າວ, ໃນເວທີສາກົນ ປະຊາຊາດໃນໂລກ ກໍ່ບໍ່ໄດ້ຫຼົດລະ ຄວາມພະຍາຍາມ ໃນການຮ່ວມມືກັນຢ່າງຈິງຈັງ ໃນການວາງນະໂຍບາຍ, ຍຸດທະສາດ ລະດັບໂລກ ແລະ ມາດຕະການຕ່າງໆນາໆ ເພື່ອຊອກຫາວີທີແກ້ໄຂບັນຫາສິ່ງແວດລ້ອມຮ່ວມກັນ. ​ສະເພາະ ສປປ ລາວ, ພັກ-ລັດຖະບານ ຂອງ​ພວກ​ເຮົາ​ຍາມ​ໃດກໍ່ໄດ້ປະຕິບັດນະໂຍບາຍ ອັນສະເໝີຕົ້ນສະ  ເໝີປາຍ ໃນການພັດທະນາເສດຖະກິດ-ສັງຄົມ ດ້ວຍຈັງຫວະເຕີບໂຕອັນແຂງແຮງ-ຕໍ່ເນື່ອງ, ໃນ​ປີ 2016 ທີ່​ຜ່ານ​ມາ, ສປປ ລາວ ​ໄດ້​ຮ່ວມ​ກັບ ​ບັນດາ​ປະ​ເທດ​ສະມະ​ຊິກ​ ຂອງອົງການ​ສະຫະ​ປະຊາ​ຊາດ ໄດ້​ຮັບຮອງ​ເອົາ 17 ​ເປົ້າໝາຍ​ການ​ພັດທະນາ​ແບບ​ຍືນ​ຍົງ, ​ໂດຍ​ໄດ້​ກໍານົດ​ເອົາ​ເສດຖະກິດ​ສີຂຽວ​ ໃນ​ການ​ຂັບ​ເຄື່ອ​ນ​ໂລກ​ ໄປ​ສູ່ ​ການ​ພັດທະນາແບບຍືນຍົງ, ໄດ້ໃຫ້ສັດຕະຍາບັນສັນຍາປາຣີ ເປັນປະເທດທໍາອິດ ໃນບັນດາປະເທດອາຊຽນ. ພ້ອມດຽວກັນນັ້ນ, ພວກເຮົາ ກໍ່ໄດ້ເອົາໃຈໃສ່ ວາງ ເປົ້າໝາຍຍຸດທະສາດດ້ານປ່າໄມ້ ເພື່ອບັນລຸເນື້ອທີ່ຄວາມປົກຫຸ້ມ ຂອງປ່າໄມ້ ໃຫ້ໄດ້ 70% ໃນປີ 2020. ປະຈຸບັນ, ມີປ່າປ້ອງກັນແຫ່ງຊາດ ຈໍານວນ 49 ແຫ່ງ ເນື້ອທີ່ທັງໝົດ 7,5 ລ້ານເຮັກຕາ, ປ່າສະຫງວນແຫ່ງຊາດ 24 ແຫ່ງ ເນື້ອທີ່ທັງໝົດ 3,7 ລ້ານເຮັກຕາ ແລະ ປ່າຜະລິດ 51 ແຫ່ງ ເນື້ອທີ່ທັງໝົດ 3,1 ລ້ານເຮັກຕາ ແລະ ຍັງມີປ່າສະຫງວນ, ປ່າປ້ອງກັນ ຂັ້ນແຂວງ, ຂັ້ນເມືອງ ຄຸ້ມຄອງ ແລະ ປ່າປູກອີກ ເຊີ່ງມີເນື້ອທີ່ທັງໝົດ 2.2 ລ້ານເຮັກຕາ. ໄດ້​ປະກາດໃຊ້ບັນດານິຕິກຳ ທີ່ ຕິດພັນກັບ ການປົກປັກຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມ ເປັນຕົ້ນ: ກົດໝາຍ ວ່າດ້ວຍ ການປົກປັກຮັກສາສິ່ງແວດລ້ອມ, ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍທີ່ດິນ, ກົດໝາຍ ວ່າດ້ວຍ ນໍ້າ ແລະ ຊັບພະຍາກອນນໍ້າ, ກົດໝາຍ ວ່າດ້ວຍ ສັດນໍ້າ ແລະ ສັດປ່າ, ດຳລັດ ວ່າດ້ວຍ ການປະກາດໃຊ້ມາດຕະຖານສິ່ງແວດລ້ອມແຫ່ງຊາດ ແລະ ກົດໝາຍລະບຽບການອື່ນໆ ທີ່ກ່ຽວຂ້ອງ, ໄປພ້ອມໆກັບການວາງມາດຕະການທີ່ເໝາະສົມ ໃນການປົກປັກຮັກສາຊັບພະຍາ ກອນທໍາຊາດ ແລະ ສິ່ງແວດລ້ອມ ໂດຍຮັບປະກັນໃຫ້ມີການພັດທະນາແບບຍືນຍົງ ແລະ ສີຂຽວ. ພວກເຮົາ ຍັງໄດ້ຮ່ວມມື ແລະ ປະຕິບັດພັນທະຕໍ່ພາກພື້ນ, ອະນຸພາກພື້ນ ແລະ ສາກົນ ທີ່ ສປປ ລາວ ໄດ້ເປັນພາຄີ ແລະ ລົງນາມ.

ໃນນາມລັດຖະບານ ແຫ່ງ ສປປ ລາວ, ຂ້າພະເຈົ້າ ຂໍຖືໂອກາດນີ້ ສະແດງຄວາມຍ້ອງຍໍ ຊົມເຊີຍ ມາຍັງທຸກພາກສ່ວນ ທຸກຂະແໜງການ, ອໍານາດການປົກຄອງທ້ອງຖິ່ນ, ຕະຫຼອດຮອດ ພໍ່ແມ່ປະຊາຊົນບັນດາເຜົ່າທຸກທົ່ວໜ້າ, ສະຖາບັນການສຶກສາ, ອົງການຈັດຕັ້ງມະຫາຊົນ ທີ່ໄດ້ປະ ກອບສ່ວນຢ່າງ​ຕັ້ງໜ້າ ແລະ ມີຄວາມຮັບຜິດຊອບຮ່ວມກັນເຂົ້າໃນການປົກປັກຮັກສາ ແລະ ສ້າງ ສາພັດທະນາປະເທດຊາດ ຢ່າງເປັນເຈົ້າການ, ໂດຍຮັບປະກັນຄວາມສົມດູນ ລະຫວ່າງ ການເຕີບ ໂຕທາງ ດ້ານເສດຖະກິດ-ສັງຄົມກັບ ການປົກປັກຮັກສາສິ່ງແວດລ້ອມ ແລະ ການນຳໃຊ້ຊັບພະຍາ ກອນທຳມະຊາດຢ່າງສົມເຫດສົມຜົນ ເພື່ອຮັກສາໄວ້ໃຫ້ລຸ້ນລູກຫຼານໄດ້ຊົມໃຊ້. ຂໍ​ສະ​ແດງ​ຄວາມ​ຂອບ​ໃຈ ​ມາ​ຍັງ​ບັນດາ​ປະ​ເທດ​ເພື່ອນ​ມິດ, ອົງການ​ຈັດຕັ້ງສາກົນ, ສະ​ຖາ​ບັນ​ການ​ເງິນ​ ລະຫວ່າງ​ ປະ​ເທດ, ອົງການຈັດ​ຕັ້ງ​ທີ່​ບໍ່​ຂຶ້ນກັບ​ລັດຖະບານ ແລະ ຜູ້ປະກອບ​ການ ​ທັງ​ພາຍ​ໃນ ແລະ ຕ່າງປະ​ເທດ ທີ່​ໄດ້​ໃຫ້ການ​ສະໜັບສະໜູນ ແລະ ​ຊ່ວຍ​ເຫຼືອ​ ແກ່​ ສປປ ລາວ ​ໃນ​ການປົກປັກຮັກສາຊັບພະຍາ ກອນທໍາມະຊາດ ແລະ ​ແກ້​ໄຂບັນຫາສິ່ງແວດລ້ອມຕະຫຼອດມາ.

ພີ່ນ້ອງຮ່ວມຊາດ ທີ່ຮັກແພງ ທັງຫຼາຍ,

 

ສຸດທ້າຍນີ້, ຂ້າພະເຈົ້າ ຂໍຮຽກຮ້ອງມາຍັງທຸກອົງການຈັດຕັ້ງ ຂອງ ພັກ-ລັດ, ອົງການປົກ ຄອງທຸກຂັ້ນ, ອົງການຈັດຕັ້ງມະຫາຊົນ, ຫົວໜ່ວຍທຸລະກິດ, ຕະຫຼອດເຖິງ ພໍ່ແມ່ປະຊາຊົນ ທຸກ ທົ່ວໜ້າ ຈົ່ງສືບຕໍ່ໃນການຈັດຕັ້ງປະຕິບັດພັນທະຂອງຕົນ ໃນການປົກປັກຮັກສາຊັບພະຍາກອນທໍາ ມະຊາດ ແລະ ສິ່ງແວດລ້ອມ ຕາມທີ່ໄດ້ລະບຸໄວ້ ໃນລັດຖະທຳມະນູນ ທີ່ວ່າ: "ທຸກອົງການຈັດຕັ້ງ ແລະ ພົນລະເມືອງ ຕ້ອງປົກປັກຮັກສາສິ່ງແວດລ້ອມ, ປົກປັກຮັກສາຊັບພະຍາກອນທຳມະຊາດ: ໜ້າດິນ, ປ່າໄມ້, ສັດ, ແຫຼ່ງນ້ຳ ແລະ ອາກາດ"; ພ້ອມກັນສູ້ຊົນຈັດຕັ້ງປະຕິບັດມະຕິກອງປະຊຸມ ໃຫຍ່ ຄັ້ງທີ X ຂອງພັກ ກໍ່ຄື ການຈັດຕັ້ງປະຕິບັດເປົ້າໝາຍໃຫຍ່ ຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຮອດປີ 2020 ຄື ຕ້ອງບັນລຸ ເຮັດໃຫ້ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຮັບການປົກປັກຮັກສາ ແລະ ນໍາໃຊ້ຢ່າງມີປະສິດທິຜົນ ຕາມທິດ ສີຂຽວ ແລະ ຍືນຍົງ; ສ້າງຄວາມກຽມພ້ອມຮັບມືກັບໄພພິບັດທຳມະຊາດ ແລະ ການປ່ຽນແປງດິນຟ້າອາກາດ ຢ່າງທັນການ, ສົ່ງເສີມຄຸນນະພາບສິ່ງແວດລ້ອມຕົວເມືອງ ທົ່ວ ສປປ ລາວ “ຂຽວ ສະອາດ ງາມຕາ” ຕິດພັນກັບການສ້າງໜໍ່ແໜງການພັດທະນາເສດຖະກິດສີຂຽວ ຂັບເຄື່ອນໃຫ້ ສປປ ລາວ ບັນລຸ 18 ເປົ້າໝາຍການພັດທະນາແບບຍືນຍົງ ທີ່ ສປປ ລາວ ໄດ້ຮັບຮອງ.

ອີກເທື່ອໜຶ່ງ, ຂ້າພະເຈົ້າ ຂໍຮຽກຮ້ອງມາຍັງ ພີ່ນ້ອງຮ່ວມຊາດທັງໝົດ ຈົ່ງພ້ອມກັນສ້າງສາຍ ສໍຳພັນ ລະຫວ່າງ ມະນຸດ ກັບ ທໍາມະຊາດ, ຮ່ວມກັນປົກປັກຮັກສາ, ໃຫ້ຄວາມສໍາຄັນ ແລະ ຮູ້ຄຸນ ຄ່າ ຂອງທໍາມະຊາດ; ສ້າງຄວາມເຂົ້າໃຈ ແລະ ຊ່ວຍກັນປົກປ້ອງຄວາມສົມບູນ ຂອງຊັບພະຍາ ກອນທໍາມະຊາດ ແລະ ສິ່ງແວດລ້ອມ, ເພື່ອຫຼຸດຜ່ອນຜົນກະທົບ ຈາກບັນຫາສິ່ງແວດລ້ອມ ຮ່ວມ ກັນໃນທົ່ວໂລກ. ເອົາໃຈໃສ່ສ້າງຄວາມພ້ອມທາງດ້ານບຸກຄະລາກອນ ໃນທຸກລະດັບ ນັບແຕ່ ຂັ້ນ ສູນກາງ ຈົນຮອດ ທ້ອງຖິ່ນ; ພ້ອມກັນຫັນເຂົ້າສູ່ການຄຸ້ມຄອງລັດດ້ວຍກົດໝາຍຢ່າງເຂັ້ມງວດ. ພ້ອມກັນອອກ​ແຮງ​ປຸກລະດົມ​ທົ່ວ​ສັງຄົມ ​​ໃນ​ການ​ປົກ​ປັກ​ຮັກສາ​ທໍາ​ມະ​ຊາດ ເພື່ອທຸກ​ສິ່ງ​ທີ່​ມີຊີວິດ ຕາມ​ຄຳຂວັນ ວັນສິ່ງແວດລ້ອມໂລກ ປີ 2017 ນີ້ ຄື: ພວກເຮົາຢູ່ກັບທຳມະຊາດ ຂາດທໍາມະ ຊາດ ກໍ່ຄື ຂາດຊີວິດ.