Main Menu

Joomla Slide Menu by DART Creations

ສະຖິຕິຈຳນວນຜູ້ເຂົ້າຊົມ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterຜູ້ເຂົ້າຊົມ ວັນນີ້996
mod_vvisit_counterຜູ້ເຂົ້າຊົມ ມື້ວານ1435
mod_vvisit_counterຜູ້ເຂົ້າຊົມ ອາທິດນີ້3428
mod_vvisit_counterຜູ້ເຂົ້າຊົມ ອາທິດ ຜ່ານມາ6025
mod_vvisit_counterຜູ້ເຂົ້າຊົມ ເດືອນນີ້15971
mod_vvisit_counterຜູ້ເຂົ້າຊົມ ເດືອນຜ່ານມາ19872
mod_vvisit_counterລວມທັງຫມົດ35843

Online (20 minutes ago): 28
Your IP: 54.81.79.128
,
Today: ຕ. ລ. 18, 2017
ຄຳສັ່ງ ວ່າດ້ວຍ ການເພ່ີມທະວີ ຄວາມເຂັ້ມງວດ ໃນການຄຸ້ມຄອງ ແລະ ກວດກາ ການຂຸດຄົ້ນໄມ້, ເຄ່ືອນຍ້າຍໄມ້... PDF ພິມ ອີເມລ
ຂຽນໂດຍ ສົມອຸລາ ຍະພິຈິດ   
ວັນຈັນທີ່ 23 ພຶດສະພາ 2016 ເວລາ 14: 45

ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ

ສັນຕິພາບ ​ເອກະລາດ ປະຊາທິປະ​ໄຕ ​​ເອກະ​ພາບ ວັດ​ທະນາ​ຖາວອນ

ນາຍົກລັດຖະມົນຕີເລກທີ 15 /ນຍ

ນະຄອນຫລວງ​ວຽງຈັນ​, ວັນ​ທີ 13.05.2016

ຄ​ຳສັ່ງ

ວ່າ​ດ້ວຍ​ການ​ເພ່ີມ​ທະວີ​ຄວາມ​ເຂັ້ມ​ງວດ​

ໃນ​ການ​ຄຸ້ມ​ຄອງ ​ແລະ ກວດກາ​ການ​ຂຸດ​ຄົ້ນ​ໄມ້, ​ເຄ່ືອນ​ຍ້າຍ​​ໄມ້​ ແລະ​ ທຸລະ​ກິດ​ໄມ້

​ເຖິງ: ບັນດາ​ທ່ານ​ ລັດຖະມົນຕີ, ຫົວໜ້າ​ອົງການ​ລັດ ​ທຽບ​ເທົ່າ​ກະຊວງ, ​ເຈົ້າ​ຄອງ​ນະຄອນຫລວງ​ວຽງ​ຈັນ ​ແລະ ບັນດາ​ທ່ານ​ເຈົ້າ​​ແຂວງ​ ໃນ​ທົ່ວ​ປະ​ເທດ

- ອີງ​ຕາມ​ກົດໝາຍ​ ວ່າ​ດ້ວຍ​ລັດຖະບານ (ສະບັບ​ປັບປຸງ) ສະ​ບັບ​ເລກທີ 69/ສພຊ, ລົງ​ວັນ​ທີ 15ທັນວາ 2015.

- ອີງ​ຕາມ​ກົດໝາຍ​ ວ່າ​ດ້ວຍ​ປ່າ​ໄມ້ ສະບັບ​ເລກທີ 06/ສພຊ, ລົງ​ວັນ​ທີ 24 ທັນວາ 2007.

- ອີງ​ຕາມ​ຜົນ​ກອງ​ປະຊຸມ ​ນາຍົກ-ຮອງ​ນາຍົກ ລັດຖະມົນຕີ ຄັ້ງ​ວັນ​ທີ 05 ພຶດສະພາ 2016

​ເພື່​ອ​ເປັນ​ການ​ເພ່ີມ​ທະວີ​ ໃນ​ການຈັດ​ຕັ້ງ ​ປະຕິບັດ​ວຽກ​ງານ ​ຄຸ້ມ​ຄອງ​ປ່າ​ໄມ້, ການ​ທຸລະ​ກິດ​ໄມ້, ການ​ຂຸດ​ຄົ້ນ​ໄມ, ປຸງ​ແຕ່ງ​ໄມ້​ ແລະ ຊື້-ຂາຍ​ໄມ້ ​ໃຫ້​ມີ​ຄວາມ​ເຂັ້ມ​ງວດ​ ຕາມ​ກົດໝາຍ ​ແລະ ​ ລະບຽບການ ຕ່າງໆ​ທີ່​ລັດຖະບານ​ ໄດ້​ວາງ​ອອກ​ໃຫ້​ມີ​ຄວາມ​ສັກສິດ, ທັງ​ເປັນ​ການ​ສະກັດ​ກັ້ນ, ຕ້ານ ​ແລະ ​ແກ້​ໄຂ​ປະ ກົດ​ການ​ຫຍໍ້​ທໍ້​ດ້ານ​ຕ່າງໆ ​ໃນ​ຂົ​ງ​ເຂດ​ວຽກ​ງານ​ປ່າ​ໄມ້  ​ໃຫ້​ຫລຸດ​ລົງ ​ແລະ ໝົດ​ໄປ​ເທ່ືອ​ລະ​ກ້າວ.

ນາຍົກລັດຖະມົນຕີ ອອກ​ຄຳ​ສັ່ງ:

1. ບັນດາ​ກະຊວງ, ຂະ​ແໜງ​ການ​ ທີ່​ກ່ຽວຂ້ອງ ​ແລະ ອຳນາດ​ການ​ປົກ​ຄອງ​ ທ້ອງ​ຖິ່ນ​ທຸກ​ຂັ້ນ ​ເພ່ີມ​ທະວີ​ ຄວາມ​ເອົາ​ໃຈ​ໃສ່ ​ແລະ ຄວາມ​ຮັບຜິດຊອບ​ ໃນ​ການ​ປະຕິບັດ, ໜ້າ​ທີ່, ຂອບ​​ເຂດສິດ ​ແລະ ຄວາ​ມຮັບຜິດຊອບ​ ໃຫ້​ຖືກຕ້ອງ ​ຕາມ​ກົດໝາຍ ​ແລະ ​ລະບຽບ​ການ​ຕ່າງໆ​ ທີ່​ໄດ້​ກຳນົດອອກ ​ໂດຍ​ສະ​ເພາະ​ ແມ່ນ​ກົດ ໝາຍ ​ແລະ ລະ​ບຽບການ​ຕ່າງໆ​ ທີ່​ກ່ຽວຂ້ອງ​ກັບ​ ການ​ຄຸ້ມ​ຄອງ​ປ່າ​ໄມ້, ການ​ຂຸດ​ຄົ້ນ​ໄມ້, ການ​ເຄື່ອນຍ້າຍ​ໄມ້ ​ແລະ ທຸລະ​ກິດ​ໄມ້.

2. ​ໃຫ້​ຢຸດຕິ​ການ​ສົ່ງ​ອອກ ​ໄມ້​ທ່ອນ​, ​ໄມ້ຕີ​ຕັບ, ​ໄມ້​ແປ​ຮູບ, ​ໄມ້​ຊອຍ, ຮາກ​ໄມ້ ຫລື ​ເຫງົ້າ​ໄມ້, ຕໍ​ໄມ້, ປູດ​ໄມ້,ງ່າ​ໄມ້ ​ແລະ ​ໄມ້​ຢືນ​ຕ​້ົນ ຫລື ​ໄມ້​ປະດັບ ທີ່​ຂຸດ​ຄົ້ນ​ອອກ​ຈາກ​ປ່າ​ ທຳ​ມະ​ຊາດ ​ໄປ​ຕ່າງປະ​ເທດ ​ໃນ​ທຸກ​ກໍລະນີ​ຢ່າງ​ເດັດຂາດ​ ລວມທັງ​ໄມ້​ທີ່​ລັດຖະບານ ​ໄດ້​ອະນຸມັດ​ຜ່ານ​ມາ​ ແຕ່ຍັງບໍ່ທັນ ໄດ້ຈັດຕັ້ງປະຕິບັດ; ໃຫ້ປຸງແຕ່ງເປັນ ຜະລິດຕະພັນ ສຳເລັດຮູບ ຕາມມາດຕະຖານ ທີ່ກະຊວງອຸດສາຫະກຳ ແລະ ການຄ້າວາງອອກ (ຕາມຂໍ້ຕົກລົງ ສະບັບເລກທີ 2005/ອຄ.ກອຫ, ລົງວັນທີ 28/9/2015) ແລ້ວຈຶ່ງອະນຸຍາດໃຫ້ສົ່ງອອກ.


3. ຫ້າມນຳໄມ້ ແລະ ເຄື່ອງປ່າຂອງດົງ ທີ່ບໍ່ຖືກຕ້ອງ ຕາມກົດໝາຍ ແລະ ລະບຽບການຈາກຕ່າງປະເທດ ມາຜ່ານເພື່ອສົ່ງໄປ ປະເທດທີສາມ.


4. ໃຫ້ສືບຕໍ່ປະຕິບັດ ຕາມຄຳສັ່ງ ຂອງນາຍົກລັດຖະມົນຕີ ສະບັບເລກທີ 31/ນຍ, ລົງວັນທີ 5 ພະຈິກ 2013, ວ່າດ້ວຍຢຸດຕິຊ່ົວຄາວ ການຂຸດຄົ້ນໄມ້ ຈາກເຂດປ່າຜະລິດ ແລະ ໃຫ້ສືບຕໍ່ ສ້າງແຜນຈັດສັນປ່າ ຜະລິດໃຫ້ສຳເລັດ ແລ້ວລາຍງານ ລັດຖະບານເພ່ືອພິຈາລະນາ.

4.1 ສຳລັບການຂຸດຄ້ົ້ນໄມ້ ອອກຈາກເຂດກໍ່ສ້າງ ພື້ນຖານໂຄງລ່າງເຊ່ັນ: ແລວບຸກເບີກກໍ່ສ້າງ ເສັ້ນທາງໃໝ່, ເຂດກໍ່ສ້າງເຂື່ອນໄຟຟ້າ, ເຂດທີ່ນ້ຳຈະຖ້ວມ, ເຂດຂຸດຄົ້ນແຮ່ທາດ ແລະ ອື່ນໆ ແມ່ນໃຫ້ມີການສຳຫລວດ, ຂຶ້ນບັນຊີຈຳນວນ ແລະ ບໍລິມາດ ໄມ້ໃຫ້ລະອຽດແລ້ວ ຈິ່ງສະເໜີລັດຖະບານ ພິຈາລະນາ ເພ່ືອສັງລວມ ເຂົ້າແຜນຂຸດຄົ້ນໄມ້ ປະຈຳປີແລ້ວສະເໜີ ສະພາແຫ່ງຊາດ ພິຈາລະນາ.

4.2 ກໍລະນີທີ່ໄດ້ຮັບ ອະນຸຍາດໃຫ້ຂຸດຄົ້ນ ແມ່ນຕ້ອງໄດ້ມີການຄຸ້ມຄອງ, ກວດກາການຕັດໄມ້ ຢ່າງເຂ້ັມງວດຕາມຈຳນວນ, ບໍລິມາດໄມ້ ແລະ ຂອບເຂດ ທີ່ໄດ້ຮັບອະນຸຍາດ. ຖ້າຫາກມີການຕັດເກີນຈຳນວນ ຫລື ຕັດຢູ່ນອກເຂດ ທີ່ໄດ້ຮັບອະນຸຍາດ ແມ່ນໃຫ້ດຳເນີນການຢຶດ, ປັບໃໝ ພ້ອມທັງດຳເນີນຄະດີ ຕາມກົດໝາຍ.

4.3 ຫ້າມອະນຸຍາດ ໃຫ້ຜູ້ພັດທະນາໂຄງການ ຫລື ຫົວໜ່ວຍຮັບເໝົາກໍ່ສ້າງ ພື້ນຖານໂຄງລ່າງຕ່າງໆ ເປັນຜູ້ດຳເນີນການ ຂຸດຄົ້ນໄມ້; ລັດເປັນ ຜູ້ຮັບຜິດຊອບ ໂດຍກົງໃນການຂຸດຄົ້ນ ແລະ ຂາຍໄມ້. ຫ້າມບໍ່ໃຫ້ເອົາໄມ້ ຊຳລະໂຄງການພັດທະນາ ພື້ນຖານໂຄງລ່າງ ໂດຍກົງ ຫລື ການເອົາໄມ້ຕຸບໂຄງການ.

5. ໃນເຂດພັດທະນາ ກໍ່ສ້າງພື້ນຖານໂຄງລ່າງ, ເຂດຂຸດຄົ້ນແຮ່ທາດ ແລະ ເນື້ອທີ່ທຳການຜະລິດຕ່າງໆ ທີ່ລັດຖະບານຍັງບໍ່ທັນ ໄດ້ອະນຸມັດ ແມ່ນຫ້າມ ບໍ່ໃຫ້ດຳເນີນການສຳຫລວດ ແລະ ຂຸດຄົ້ນໄມ້ຢ່າງເດັດຂາດ.

6. ໃຫ້ຢຸດຕິການສະເໜີ ແລະ ອະນຸຍາດເກັບກູ້, ທ້ອນໂຮມໄມ້ກິ່ງງ່າ, ໄມ້ທ່ອນສັ້ນ, ໄມ້ນອນຂອນຕາຍ ແລະ ບໍ່ອະນຸຍາດ ໃຫ້ເອົາໄມ້ແກ້ໄຂນະໂຍບາຍ ໃຫ້ແກ່ບຸກຄົນໃດໜຶ່ງ.

7.ໃຫ້ກະຊວງກະສິກຳ ແລະ ປ່າໄມ້ ເປັນໃຈກາງສົມທົບ ກັບຂະແໜງການ ທີ່ກ່ຽວຂ້ອງ ແລະ ທ້ອງຖິ່ນກວດກາ ແລະ ເກັບກຳຂໍ້ມູນລະອຽດ; ຈຳນວນ, ບໍລິມາດໄມ້ ແລະ ພັນທະຄ້າງຢູ່ສະໜາມ 2 ທີ່ໄດ້ຮັບອະນຸຍາດ ໃຫ້ຂຸດຄົ້ນຈາກລັດຖະບານ ໃນໄລຍະຜ່ານມາ ເພ່ືອລາຍງານລັດຖະບານ ພິຈາລະນາ ໂດຍມອບໃຫ້ຂະແໜງການ ທີ່ກ່ຽວຂ້ອງປະມູນຂາຍ ໃຫ້ແກ່ສະມາຄົມ ອຸດສາຫະກຳ ປຸງແຕ່ງໄມ້ແຫ່ງຊາດ ແລະ ສະມາຄົມເຟີນີເຈີລາວ ຫລື ຜູ້ປະກອບ ການອື່ນໆ ເພື່ອນຳມາປຸງແຕ່ງ ເປັນຜະລິດຕະພັນ ສຳເລັດຮູບ ເພື່ອຂາຍຢູ່ພາຍໃນ ຫລື ສົ່ງ​ອອກ.

7.1 ສຳລັບ​ໄມ້ທີ່​ຂຸດ​ຄົ້ນ ​ເກີນ​ແຜນການ​ ທີ່​ລັດຖະບານ ອະນຸມັດ ​ແມ່ນ​ໃຫ້ຢຶດ​ເປັນ​ຂອງ​ລັດ ​ແລ້ວດຳ​ເນີນ​ຄະດີ​ ຕໍ່​ຜູ້​ກະທຳ​ຜິດ ​ຢ່າງ​ເຂັ້ມ​ງວດ.

7.2 ສ່ວນ​ໄມ້​ທີ່​ຂຸດ​ຄົ້ນ ​ໂດຍ​ບໍ່​ໄດ້​ຮັບ​ອະນຸຍາດ, ຜິດ​ຕໍ່​ລະບຽບ​ກົດໝາຍ ​ແລະ ​ຍັງ​ຄ້າງ​ຢູ່​ສະໜາມ 1 ​ແມ່ນ​ບໍ່​ໃຫ້​ເກ​ັບກູ້ ຫລື ທ້ອ​ນ​ໂຮມ​ອີກ ​ເພາະ​ຈະ​ເປັນ​ຊ່ອງ​ຫວ່າງ​ໃຫ້​ແກ່​ການ ​ລັກລອບ​ຕັດ​​ໄມ​້ຕໍ່​ໄປ.

8. ການ​ຂຸດ​ຄົ້ນ​ໄມ້ ​ເພື່ອ​ເປັນ​ແຫ​ລ່ງພະລັງງານ (​ເຊັ່ນ: ​ໄມ້​ຟືນ, ​ໄມ້​ເຮັດ​ຖ່ານ), ​ໄມ້​ຫລັກ​ຮົ້ວ, ​ໄມ້ຄ້ຳ​ແບບ ​ແມ່ນ​ອະນຸຍາດ​ ໃຫ້​ເອົາ​ສະ​ເພາະ​ ຈາ​ກ​ເນື້ອ​ທີ່​ຄຸ້ມ​ຄອງ​ຂອງ​ປະຊາຊົນ ​ແລະ ປ່າ​ຊົມ​ໃຊ້​ຂອງ​ບ້ານ​ ທີ່​ໄດ້​ຜ່ານ​ການ​ ມອບ​ດິນ-ມອບ​ປ່າ ຫລື ​ເອົາ​ຈາກ​ເຂດ​ກໍ່ສ້າງ​ພື້ນຖານ​ ໂຄງ​ລ່າງ​ທີ່​ໄດ້​ຮັບ​ອະນຸມັດ ​ຈາກ​ລັດຖະບານ ​ຊຶ່ງ​ໄດ້​ຜ່ານ​ການ​ ສຳຫລວດ​ລະອຽດ ​ໂດຍ​ໃຫ້​ສັງ​ລວມ​ ເຂົ້າ​ແຜນການ​ຂຸດ​ຄົ້ນ​ໄມ້​ປະຈຳ​ປີ.

9. ​ໃຫ້​ກະຊວງ​ກະສິກຳ ​ແລະ ປ່າ​ໄມ້ ສົມທົບ​ກັບ​ ອົງການ​ປົກຄອງ​ທ້ອງ​ຖິ່ນ ຄົ້ນ​ຄວ້າ ​ແລະ ສົ່ງ​ເສີມ​ການ​ລົງທຶນ​ ໃສ່​ການ​ຂຸດ​ຄົ້ນ​ໄມ້ ​ໂດຍ​ນຳ​ໃຊ້​ທ່າ​ແຮງ​ຂອງ​ພາກ​ລັດ ​ແລະ ຜູ​້ປະກອບ​ການ ​ເພື່ອ​ສ້າງ​ໃຫ້​ມີ​ການຈັດ​ຕັ້ງ ​ຫລື ກອງ​ຂຸດ​ຄົ້ນ​ໄມ້​ ທີ່​ເປັນ​ໜ່ວຍ​ງານ​ເຄື່ອນ​ໄຫວ ​ແບບ​ວິຊາ​ຊີບ ​ເປັນ​ປົກກະຕິ​ຕໍ່​ເນື່ອງ, ປະສົມ​ປະສານ​ໄປ​ກັບ ​ການ​ປົກ​ປັກຮັກສາ, ບູລະນະ​ປ່າ​ໄມ້ ​ໂດຍ​ຢູ່​ພາຍ​ໃຕ້​ການ​ຄຸ້ມ​ຄອງ ​ຂອງ​ອຳນາດ​ການ​ປົກຄອງ ​ແລະ ຂະ​ແໜງ​ການ​ ທີ່​ກ່ຽວຂ້ອງ​ຂອງ​ທ້ອງ​ຖິ່ນ.

10. ​ໃຫ້​ກະຊວງ​ອຸດສາຫະກຳ ​ແລະ ການ​ຄ້າ​ ເປັນ​ໃຈກາງ​ສົມທົບ​ກັບ ​ຂະ​ແໜງ​ການ​ກ່ຽວຂ້ອງ ​ແລະ​ ທ້ອງ​ຖິ່ນ ​ຮີບ​ຮ້ອນ​ດັດສົມ ​ໂຮງງານ​ປຸງ​ແຕ່ງ​ໄມ້ ​ໃຫ້​ສຳ​ເລັດ​ໂດຍ​ໄວ. ພ້ອມ​ດຽວ​ກັນ​ ກໍ່​ໃຫ້​ຊີ້​ນຳ​ສະມາຄົມ​ ອຸດສາຫະກຳ​ປຸງ​ແຕ່ງ​ໄມ້​ ແຫ່ງ​ຊາດ ​ແລະ​ ສະມາຄົມ​ເຟີ​ນີ​ເຈີ ​ປັບປຸງ​ພາລະ​ບົດບາດ ​ແລະ​ ກົນ​ໄກ​ການ​ເຄື່ອນ​ໄຫວ​ວຽກ​ງານ​ຂອງ​ຕົນ ​ໃຫ້​ມີ​ຄວາມ​ເຂ້​ັມ​ແຂງ ​ເພື່ອ​ປະຕິບັດ​ນະ​ໂຍບາຍ ​ສົ່ງ​ເສີມ​ການ​ປຸງ​ແຕ່ງ​ໄມ້​ ຢູ່​ພາຍ​ໃນ​ໃຫ້​ສາມ​າດສ້າງ​ ມູນ​ຄ່າ​ເພ່ີມ ​ແລະ ​ມີ​ຄຸນ​ນະພາ​ບຕາມ​ຄວາມ​ຕ້ອງການ​ ຂອງ​ຕະຫລາດ​ພາຍ​ໃນ ​ແລະ ຕ່າງປະ​ເທດ.

11. ​ໃຫ້​ກະຊວງ​ກະສິກຳ ​ແລະ​ ປ່​່າ​ໄມ້ ​ເປັນ​ເຈົ້າ​ການ​ສົມທົບ​ ກັບ​ກະຊວງ​ປ້ອງ​ກັນ​ປະ​ເທດ ​ແລະ ​ຂະ​ ແໜ ​ງການ​ອື່ນໆ ທີ່​ກ່ຽວຂ້ອງ​ກວດກາ ​ລາດຕະ​ເວນ​ຕາມ​ເຂດ​ລຽບ​ຕາມ​ຊາຍ​ແດນ ​ທີ່​ຫລໍ່​ແຫລມ, ມີ​ການ​ລັກ​ຂຸດ​ຄົ້ນ​ໄມ້, ​ສະຖານ​ທີ່​ຂຸດ​ຄົ້ນ​ໄມ້, ​ເສັ້ນທາງ​ຂົນ​ສົ່ງ​ໄມ້, ສະໜາມ​​ໄມ້, ​ໂຮງ​ເລື່ອຍ, ​ໂຮງງານ​ປຸງ​ແຕ່ງ​ໄມ້, ​ໂຮງງານ​ເຟີ​ນີ​ເຈີ, ສາງ​ເກັບ​ມ້ຽນ​ໄມ້, ​ໂຮ​ງງານ​ທີ່​ນຳ​ໃຊ້​ໄມ້​ເປັນ​ພະລັງງານ ​ແລະ​ສະຖານ​ທີ່​ກ່ຽວຂ້ອງ​ອື່ນໆ​ຕາມ​ການ​ລາຍ​ງານ​ມາ​ແລ້ວ. ຖ້າ​ມີ​ການລະ​ເມີດ ຫລື ການ​ກະທຳ​ຜິດ ​ແມ່ນ​ໃຫ້​ດຳ​ເນີນ​ການ ​ສືບສວນ-ສອບ​ສວນ ​ເພື່ອ​ມີ​ມາດ​ຕະການ​ ທາງ​ແພ່ງ ​ແລະ​ທັງ​ອາຍາ; ​ໃນ​ກໍລະນີ​ຮ້າຍ​ແຮງ ​ແມ່ນ​​ໃຫ້​ປະກອບ​ສຳນວນ​ຄະດີ​ສົ່ງ​​ໄອ​ຍະ​ການ ​ເພື່ອ​ສັ່ງ​ຟ້ອງ​ຂຶ້ນສານ. ພ້ອມ​ດຽວ​ກັນ​ກໍ​ໃຫ້​ດຳ​ເນີນ​ ການ​ກວດກາ​ການ​ນຳ​ເຂົ້າ, ການ​ຊື້-ຂາຍ, ການ​ມີ​ໄວ້​ໃນ​ຄອບ​ຄອງ ​ແລະ ​ການ​ນຳ​ໃຊ້​ເຄື່ອງ​ມື​ອຸປະກອນ, ​ເຄື່ອງ​ຈັກ ​ແລະ ​ພາຫະນະ​ຂຸດ​ຄົ້ນ​ໄມ້​ ທີ່​ບໍ່​ໄດ້​ຮັບ​ອະນຸຍາດ​ຈາກ ​ຂະ​ແໜງ​ການ​ກ່ຽວຂ້ອງ, ຖ້າ​ມີ​ກາ​ນຊຸກ​​ເຊື່ອງ ​ເພື່ອ​ລັກລອບ​ນຳ​ໃຊ້​ ແມ່ນ​ໃຫ້​ຢຶດ​ໄວ້​ ແລ້ວ​ດຳ​ເນີນ​ຄະດີ​ຕໍ່​ຜູ້​ກະທຳ​ຜິດ ​ຕາມ​ລະບຽບ​ກົດໝາຍ​ ຢ່າງ​​ເຂັ້ມ​ງວດ.

12. ​ໃຫ້​ກະຊວງ​ກະສິກຳ ​ແລະ​ ປ່າ​ໄມ້, ກະຊວງ​ຊັບພະຍາກອນ​ ທຳ​ມະຊາດ ​ແລະ ສິ່ງ​ແວດ​ລ້ອມ, ກະຊວງ​ອຸດສາຫະກຳ ​ແລະ ການ​ຄ້າ ​ແລະ​ ກະຊວງ​ການ​ເງິນ ​ເອົາ​ໃຈ​ໃສ່​ ປັບປຸງ​ໜ່ວຍ​ງານ ​ແລະ​ ບຸກຄະລາ​ກອນ​ຂອງ​ຕົນ ທີ່​ຮັບຜິດຊອບ​ວຽກ​ງານ​ ຄຸ້ມຄອງ​ປ່າ​ໄມ້ ​ແລະ ທຸລະ​ກິດ​ໄມ້​ທັງ​ຢູ່​ສູນ​ກາງ ​ແລະ ​ທ້ອງ​ຖິ່ນ​ ໂດຍ​ໃຫ້​ປະຕິບັດ​ລະບຽບ​ການ​ ປະສານ​ສົມທົບ​ຢ່າງ​ກົມກຽວ, ປະຕິບັດ​ໜ້າ​ທີ່​ ຂອງ​ໃຜລາວ​ຢ່າງຈິງ​ຈັງ, ​ເຂັ້ມ​ງວດ ​ແລະ​ ມີ​ຄວາມ​ໂປ່​ງ​ໃສ, ​ເດັດດ່ຽວ​ປົກ​ປ້ອງ​ ສົ່ງ​ເສີມ​ຜູ້ດີ​ມີ​ຄວາມ​ສັດ​ຊື່ ​ແລະ ມີ​ຄວາມ​ສາມາດ ​ພ້ອມ​ນັ້ນ ​ກໍ​ເຂັ້ມ​ງວດ​ຕໍ່​ບຸກຄົນ​ບໍ່​ດີ ທີ່​ມີ​ການ​ສົມຮູ້​ຮ່ວມ​ຄິດ​ ສວຍ​ໂອກາດ​ຫາ​ຜົນ​ປະ​ໂຫຍ​ດ​ ໃຫ້​ແກ່​ຕົນ ​ແລະ ຝ່າ​ຝືນ​ລະບຽບ​ກົດໝາຍ ​ຢ່າງ​​ເຂັ້ມ​ງວດ.

13. ​ໃຫ້​ກະຊວງ​ຊັບພະຍາກອນ​ ທຳ​ມະ​ຊາດ ​ແລະ ​ສິ່​ງ​ແວດ​ລ້ອມ ​ເປັນ​ເຈົ້າ​ການ​ສົມທົບ​ ກັບ​ກະຊວງ​ປ້ອງ​ກັນ​ປ​ະ​ເທດ, ກະຊວງ​ປ້ອງ​ກັນ​ ຄວາມ​ສະຫງົບ, ກະຊວງ​ ກະສິກຳ ​ແລະ​ ປ່າ​ໄມ້​ ແລະ ​ອຳນາດ​ ການ​ປົກຄອງ​ທ້ອງ​ຖິ່ນ​ ເ​ພ່ີ​ມທະວີ​ການ​ເຝົ້າລະວັງ ​ແລະ​ ປ້ອງ​ກັນ​ເວ​ນຍາມ ບໍ່​ໃຫ້​ມີ​ການ​ລັກລອບ​ ຂຸດ​ຄົ້ນ​ໄມ້​ໃນ​ເຂດ​ປ່າ​ປ້ອງ​ກັນ ​ແລະ ​ປ່າ​ສະຫງວນ​ແຫ່ງ​ຊາດ ​ແລ​ະຂອງ​ທ້ອງ​ຖິ່ນ. ກໍລະນີ​ພົບ​ເຫັນ​ ປະກົດ​ການ​ລັກລອບ​ ຕັດ​ໄມ້​ໃນ​ເຂດ​ດັ່ງກ່າວ​ ຕ້ອງ​ໃຊ້​ມາດ​ຕະການ ​ເດັດຂາດ ​ແລະ ​ເຂັ້ມ​ງວດຕໍ່​ຜູ້​ກະທຳ​ຜິດ.

14. ຫ້າມ​ບັນດາ​ດ່າ​ນສາກົນ, ດ່ານ​ທ້ອງ​ຖິ່ນ, ດ່ານ​ປະ​ເພນີ ​ແລະ​ ບັນດາ​ດ່ານ​ຕ່າງໆ​ ຢູ່​ຊາຍ​ແດນ​ອະນຸຍາດ ຫລື ອຳນວຍ​ຄວາມ​ສະດວກ ​ໃນ​ການ​ສົ່ງ​ອອກ​ໄມ້ ​ແລະ ​ເຄື່ອງ​ປ່າ​ຂອງ​ດົງ ທີ່​​ໄດ້​ລະບຸ​ໄວ້​ໃນ​ຂໍ້ 2 ​ແລະ ຂໍ້ 3 ຂອງ​ຄຳ​ສັ່ງ​ ສະ​ບັບນີ້​ຢ່າງ​ເດັດຂາດ.

15. ມອບ​ໃຫ້​ ກະຊວງ​ກະສິກຳ ​ແລະ ປ່າ​ໄມ້ ​ເປັນ​ເຈ້ົາ​ການ​ສົມທົບ​ ກັບ​ກະຊວງ​ອຸດສາຫະກຳ ​ແລະ​ການ​ຄ້າ, ຂະ​ແໜງ​ການ ກ່ຽວຂ້ອງ​ຕ່າງໆ ​ແລະ ທ້ອງ​ຖິ່ນ​ຮັບຜິດຊອບ​ ຕິດຕາມ​ກວດກາ​ ການຈັດ​ຕັ້ງ​ປະຕິບັດ​ ຄຳ​ສັ່ງ​ສະບັບ​ນີ້​ຢ່າງ​ເຂັ້ມ​ງວດ ​ແລະ ລາຍ​ງານ​ລັດຖະບານ ​ເປັນ​ແຕ່ລະ​ໄລຍະ​ ເພ່ືອ​ແກ້​ໄຂ​ບັນຫາ​ຕ່າງໆ ທີ່​ອາດ​ເກີດ​ຂຶ້ນ​ ໃຫ້​ທັນ​ກັບ​ສະພາບ​ການ.

16. ​ໃຫ້​ບັນດາ​ທ່ານ​ລັດຖະມົນຕີ, ຫົວໜ້າ​ອົງການ​ລັດ​ ທຽບ​ເທົ່າ​ກະຊວງ, ​ເຈົ້າ​ຄອງ​ນະຄອນຫລວງ​ວຽງ​ຈັນ, ບັນດາ​ເຈົ້າ​ແຂວງ​ ໃນ​ທົ່ວ​ປະ​ເທດ​ ຄົ້ນຄວ້າ​ກຳ​ແໜ້ນ ​ຄຳ​ສັ່ງ​ສະບັບ​ນີ້, ພ້ອມ​ທັງ​ຜັນ​ຂະຫຍາຍ ​ອອກ​ເປັນ​ໜ້າ​ວຽກ​ລະອຽດ​ ຕາມ​ຄວາມ​ຮັບຜິດຊອບ​ ຂອງ​ຕົນ​​ໂດຍ​ໄວ ​ແລະ ຈັດ​ຕັ້ງ​ປະຕິບັດ ​ໃຫ້​ມີ​ປະສິດທິ​ຜົນ. ກໍລະນີ​ຂະ​ແໜງການ​​ໃດ, ທ້ອງ​ຖິ່ນ​ໃດ​ຫາກ​ລະ​ເມີດ​ ຕໍ່​ຄຳ​ສັ່ງ​ສະບັບ​ນີ້ ​ແມ່ນ​ຄະນະ​ນຳ​ຂອງ​ຂະ​ແໜງ​ການ​ນັ້ນ ຫລື ທ້ອງ​ຖິ່ນ​ນັ້ນ​ ຕ້ອງ​ຮັບຜິດຊອບ​ຕໍ່​ລັດຖະບານ ​ແລະ ຕໍ່​ກົດໝາຍ ​ແລະ​ລະບຽບ.

17. ຄຳ​ສັ່ງ​ສະບັບ​ນີ້​ມີ​ ຜົນ​ສັກສິດ​ນັບ​ແຕ່​ ມື້​ລົງ​ລາຍ​ເຊັນ​ເປັນ​ຕົ້ນ​ໄປ. ບັນດາ​ຄຳ​ສັ່ງ, ຂໍ້​ຕົກລົງ, ​ແຈ້ງ​ການ ​ແລະ ນິຕິ​ກຳ​ຕ່າງໆ​ ລວມທັງ​ ຂອງ​ອຳນາດ​ການ​ປົກຄອງ​ທ້ອງ​ຖິ່ນ​ ທີ່​ໄດ້​ອອກ​ຜ່ານ​ມາ ​ຊຶ່ງ​ມີ​ເນື້ອ​ໃນ​ຂັດ​ກັບ​ຄຳ​ສັ່ງ​ ສະບັບ​ນີ້​ລ້ວນ​ແຕ່​ຖືກ​ລົບ​ລ້າງ.


ນາຍົກລັດຖະມົນຕີ​ແຫ່ງ​ ສປປ ລາວ

ທອງ​ລຸນ ສີ​ສຸ​ລິດ




LAST_UPDATED2