ຄະນະນຳ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ລົງຊຸກຍູ້ວຽກງານ ທີ່ ເມືອງປະທຸມພອນ ແຂວງຈຳປາສັກ

ຄະນະນຳ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ລົງຊຸກຍູ້ວຽກງານ ທີ່ ເມືອງປະທຸມພອນ ແຂວງຈຳປາສັກ

ໃນວັນທີ 12 ມີນາ 2024 ທີ່ຜ່ານມາ, ທ່ານ ຈັນທະເນດ ບົວລະພາ ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກຊສ ພ້ອມດ້ວຍຄະນະ ໄດ້ລົງພາກສະໜາມເຄື່ອນໄຫວຊຸກຍູ້ວຽກງານຊັບພະຍາກອນນ້ຳ ຢູ່ທີ່ ເມືອງປະທຸມພອນ ແຂວງຈຳປາສັກ ໂດຍໃຫ້ການຕ້ອນຮັບການລົງຊຸກຍູ້ຕິດຕາມໃນຄັ້ງນີ້ ຂອງ ທ່ານ ຈັນທະບູນ ສີປະເສີດ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງ ຈຳປາສັກ ມີທ່ານຮອງເຈົ້າເມືອງ ເມືອງປະທຸມພອນ, ຮອງຫົວໜ້າຫ້ອງການ ຊສ ເມືອງປະທຸມພອນ ແລະ ບັນດາທ່ານ ທີ່ກ່ຽວຂ້ອງເຂົ້າຮ່ວມ.
ໃນໂອກາດລົງຊຸກຍູ້ວຽກງານໃນຄັ້ງນີ້ ທ່ານ ຮອງລັດຖະມົນຕີ ໄດ້ລົງພາກສະໜາມເບິ່ງພື້ນທີ່ການໄຫຼຂອງນ້ຳ ແລະ ເຂດອະນຸລັກຊີວະນາໆພັນຢູ່ເຂດດິນບໍລິເວນນໍ້າ ບຶງກຽດໂງ້ງ, ຢູ່ຈຸດ ບ້ານ ພະໂພ, ເມືອງ ປະທຸມພອນ ລວມທັງໄດ້ລົງພື້ນທີ່ເບິ່ງເຂດສະເໜີເພື່ອຂໍສຳປະທານໃນການຂຸດຄົ້ນແຮ່ເຫຼັກຂອງບໍລິສັດຮຸ້ຍຢວນ ມາຍນິ້ງລາວ ຈຳກັດ.
ຕອນບ່າຍ ຂອງວັນດຽວກັນ, ຍັງໄດ້ມີການຈັດກອງປະຊຸມປຶກສາຫາລືກ່ຽວກັບ ການຄຸ້ມຄອງເຂດດິນບໍລິເວນນ້ຳດັ່ງກ່າວ ລວມທັງການກຳນົດເຂດແດນ ຂອງພື້ນທີ່ສະເໜີຂໍສຳປະທານຂຸດຄົ້ນແຮ່ເຫຼັກ ຂອງບໍລິສັດຮຸ້ຍຢວນ ມາຍນິ້ງລາວ ຈຳກັດ ໂດຍໃຫ້ກຽດເປັນປະທານຮ່ວມຂອງ ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ແລະ ທ່ານ ຈັນທະເນດ ບົວລະພາ ຮອງລັດຖະມົນຕີ ກຊສ ມີ ທ່ານຮອງຫົວໜ້າຫ້ອງການ, ຮອງຫົວໜ້າກົມທີ່ດິນ ແລະ ພະນັກງານ ວິຊາການ ທີ່ກ່ຽວຂ້ອງ ໃນຂັ້ນສູນກາງ, ທ້ອງຖິ່ນ ແລະ ທີ່ປຶກສາໂຄງການດັ່ງກ່າວເຂົ້າຮ່ວມ.
ໂດຍທີ່ປະຊຸມໄດ້ຮັບຟັງ ຜົນການສຶກສາຄວາມເປັນໄປໄດ້ໃນການຈັດຕັ້ງປະຕິບັດວຽກງານຂອງໂຄງການດັ່ງກ່າວຈາກບໍລິສັດທີ່ປຶກສາ. ຫຼັງຈາກນັ້ນ ກໍໄດ້ມີການແລກປ່ຽນປະກອບຄໍາຄິດເຫັນ ຢ່າງກົງໄປກົງມາ ກ່ຽວກັບ ການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ການພັດທະນາໃນເຂດດັ່ງກ່າວ ເພື່ອຮັບປະກັນບໍ່ໃຫ້ມີຜົນກະທົບ ແລະ ໃຫ້ທຸກພາກສ່ວນມີສ່ວນຮ່ວມໃນການຄຸ້ມຄອງພື້ນທີ່ເຂດດິນບໍລິເວນນ້ຳບຶງກຽດໂງ້ງໄປຄຽງຄູ່ກັບການພັດທະນາດ້ານເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນ ພ້ອມທັງ ຮັກສາຄວາມສົມດຸນຂອງລະບົບນິເວດໃຫ້ມີຄວາມຍືນຍົງ.
 

 

ປະກາດຮັບສະໝັກລັດຖະກອນໃໝ່ ປີ 2024
ແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ ຮອບດ້ານ 18 ແຂວງ