ທ່ານ ລັດຖະມົນຕີ ກຊສ ຕ້ອນຮັບການຢ້ຽມຂໍ່ານັບຂອງ ທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ

ທ່ານ ລັດຖະມົນຕີ ກຊສ ຕ້ອນຮັບການຢ້ຽມຂໍ່ານັບຂອງ ທູຕານຸທູດ ແລະ ບັນດາຜູ້ຕາງໜ້າອົງການຈັດຕັ້ງສາກົນ

 
ໃນຕອນບ່າຍຂອງວັນທີ 13 ມີນາ 2024 ທີ່ຜ່ານມາ, ທ່ານ ນາງ ບຸນຄຳ ວໍລະຈິດ, ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ) ໄດ້ຕ້ອນຮັບ ການຢ້ຽມຂໍ່ານັບ ຂອງທ່ານ NAGASE Toshio ຫົວໜ້າອົງການຮ່ວມມືສາກົນແຫ່ງປະເທດຢີ່ປຸ່ນ ປະຈຳ ສປປ ລາວ ເຂົ້າຢ້ຽມອຳລາໜ້າທີ່ ເນື່ອງໃນໂອກາດ ສຳເລັດວາລະການປະຕິບັດໜ້າທີ່ ຢູ່ ສປປ ລາວ ຢ່າງເປັນທາງການ. ທ່ານ NAGASE Toshio ກໍໄດ້ລາຍງານ ຄວາມຄືບໜ້າ ແລະ ຜົນສະເລັດໃນການປະຕິບັດໜ້າທີ່ ຢູ່ ສປປ ລາວ ໃນໄລຍະຜ່ານມາ ໂດຍສະເພາະແມ່ນວຽກງານ ການປົກປັກຮັກສາສິ່ງແວດລ້ອມ. ໃນໂອກາດນີ້, ທ່ານກໍໄດ້ຮັບການແນະນໍາຕົວ ທ່ານ ນາງ KOBAYASHI Miyako, ຫົວໜ້າອົງການຮ່ວມມືສາກົນຍິ່ປຸ່ນ ປະຈຳ ສປປ ລາວ (ຄົນໃໝ່) ທີ່ຈະເລີ່ມການປະຕິບັດໜ້າທີ່ຢູ່ ສປປ ລາວ ນັບແຕ່ ເດືອນມີນາ 2024 ເປັນຕົ້ນໄປ ໃຫ້ທ່ານ ລັດຖະມົນຕີໄດ້ຮູ້ຈັກ.
ໃນເວລາຕໍ່ມາ ທ່ານ ນາງ ບຸນຄຳ ວໍລະຈິດ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ Bokhodir Burkhanov, ຜູ້ປະສານງານສະຫະປະຊາຊາດ (UNRC-Coordinator) ປະຈຳ ສປປ ລາວ ຜູ້ໃໝ່ ເນື່ອງໃນໂອກາດ ທີ່ໄດ້ຖືກແຕ່ງຕັ້ງໃຫ້ ມາດຳລົງຕຳແໜ່ງຢູ່ ສປປ ລາວ. ໃນໂອກາດນີ້, ທ່ານ ນາງ ບຸນຄຳ ວໍລະຈິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ສະແດງຄວາມຂອບໃຈ ຕໍ່ ອົງການສະຫະປະຊາຊາດ ທີ່ໄດ້ໃຫ້ການສະໜັບ ສະໜູນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງ ຂະແໜງ ຊັບພະຍາກອນທຳມະຊາດ ແລະ ສິ່ງແວດລ້ອມ ຕະຫຼອດມາ ໂດຍສະເພາະໃນວຽກງານ (ເປົ້າໝາຍ) ການພັດທະນາແບບຍືນຍົງ ແລະ ການແກ້ໄຂ ແລະ ການປັບຕົວເຂົ້າກັບ ສະພາບການປ່ຽນແປງດິນຟ້າອາກາດ.
ໃນຕອນແລງຂອງວັນດຽວກັນ, ທ່ານ ລັດຖະມົນຕີ ກຊສ ກໍໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ Magan Jones ເອກອັກຄະລັດຖະທູດ ແຫ່ງອົດສະຕຣາລີ ປະຈຳ ສປປ ລາວ ຄົນໃໝ່. ໃນໂອກາດນີ້, ທ່ານ ລັດຖະມົນຕີ ກຊສ ກໍໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍຕໍ່ ທ່ານ ນາາງ Magan Jones ທີ່ໄດ້ຮັບການແຕ່ງຕັ້ງມາດຳລົງຕຳແໜ່ງ ເປັນເອກອັກຄະລັດຖະທູດ ແຫ່ງ ອົດສະຕຣາລີ ປະຈຳ ສປປ ລາວ ເຊິ່ງທັງສອງ ກໍ່ໄດ້ປຶກສາຫາລືການແນວທາງ ການຮ່ວມມືລະຫວ່າງ ກຊສ ແລະ ອົດສະຕຣາລີ ໂດຍສະເພາະໃນການຮ່ວມມືດ້ານຊັບພະຍາກອນນໍ້າ ແລະ ການປ່ຽນແປງດິນຟ້າອາກາດ. ໃນຕອນທ້າຍ ທ່ານ ລັດຖະມົນຕີ ກໍ່ໄດ້ອວຍພອນໃຫ້ ທ່ານ ເອກອັກຄະລັດຖະທູດ ແຫ່ງ ປະເທດອົດສະຕຣາລີ ປະຈຳ ສປປ ລາວ ຈົ່ງປະສົບຜົນສຳເລັດໃນການປະຕິບັດໜ້າທີ່, ສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ໃຫ້ແໜ້ນແຟ້ນ, ຍາວນານ ແລະ ເກີດດອກອອກຜົນຫຼາຍກວ່າເກົ່າ.
 

 

ປະກາດຮັບສະໝັກລັດຖະກອນໃໝ່ ປີ 2024
ແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ ຮອບດ້ານ 18 ແຂວງ